Luk 1 | KYG | STEP | Ala vekamo Tiyofalasiga afiyo. Mago kava'mo lagaetegamo ago afole ai'nigeta alagi lagesa afita fatago nehune. Aepa fai'niya afinateti'mo mago vaya'mogimo ageme ageme ute'apae'mo ani kavafe'mo ava gemo ae'a hakalo hu'a hapa pai'nae. Ani vaya'mogimo hapa pai'nage'apae'mo asole vaya'mogi afite'a amalageka hu'a ani kavafe'mo ava gemo apaote apaote hu'a avo'mo kaete'a ali'a magokepi male'a avo'mo kae male'nae.

Luke 1

Luki'a Tiyofalasitegamo avo'mo kaeno atale'nigeno u'niya gemae

1 Ala vekamo Tiyofalasiga afiyo. Mago kava'mo lagaetegamo ago afole ai'nigeta alagi lagesa afita fatago nehune. Aepa fai'niya afinateti'mo mago vaya'mogimo ageme ageme ute'apae'mo ani kavafe'mo ava gemo ae'a hakalo hu'a hapa pai'nae. Ani vaya'mogimo hapa pai'nage'apae'mo asole vaya'mogi afite'a amalageka hu'a ani kavafe'mo ava gemo apaote apaote hu'a avo'mo kaete'a ali'a magokepi male'a avo'mo kae male'nae. 3 Nagae'e'mo yatala afina'mo muki kavafe'mo ava gemo alagepa hu'na ago afi'nova'mofe'mo afole aite afole aite huno afole ai'niya kavafe'mo avo'mo kaegauve, hu'na nagesa afi'nove. 4 Alika lekana paika afitekae'mo, ali'a naya male'naya gemo alagi lama gemae, huka ageka aeto hisanafe'mo avo'mo nekaove.

Enisole vekamo'a Sekalaiyasife'mo Yoni'a alika ategane, huno ha pai'niya gemae

5 Heloti'a kini vekamo mai'neno Yutiya kotegamo mai'naya vaya'aite'mo yagaino ne'apategeno'ae'mo mago vekamo mono huno ne'apateya vekamo agi'amo Sekalaiyasi'a mai'niye. Agaemo Amaiya mono hu'a ne'apataya nofi vayapati vekamo mai'nigeno a'amo Ilisamete'a ani kava'mo huno mono hu'a ne'apataya nofi vaya'mo Eloni nofi vayapati a kanomo mai'niye. 6 Ani yalavela'moganimo Goti aulagale'mo alagepa kava'mo hute'ana muki Goti ke'aepa ge'amo akame hute'ana alagepa hu'ana mai'na'ae. 7 Mai'na'a'monanafa Ilisamete'a anamo a'mo mai'neno mafa'nemo alino o'ate'nige'ana ago anau anekalomo lete'ana mai'na'ae.

8 Mago alu vaya alu vaya'mo ago mono hutage'apae'mo Sekalaiyasi vaya'amo mono nehaya afina'mo afole ai'nigeno Goti aulagale'mo mono huno apate'niye. 9 Mono hu'a ne'apataya vaya'ai kava'mo huno Sekalaiyasi'a alagepa atumo ne'aiya ya'mo hi'yalamute'mo male'neno atafi'mo kaesiyafe'mo kayo'mo lo ae'a male'naya yapati'mo yatala kayo'mo ali'niya vekamo lekana pai'a ate'nae. Lekana pai'a ate'nageno Ala kava ne'mo alopa mono no'afi'mo alagepa atumo ne'aiya ya'mo male'neno ata kaesiyafe'mo hai'nige'apae'mo 10 asole vaya'mo kumatega mai'ne'a nunumu'mo hu'nae. 11 Sekalaiyasi'a haino ageyana Ala kava ne'mo enisole veka'amo'a alagepa atumo ne'aiya ya'mo male'ne'a ata nekaya hi'yalamute'mo lamaga haopale'mo he tino mai'nigeno age'niye. 12 Ageteno'ae'mo hau aiteno koli hu'niya'monanafa 13 enisole vekamo'a, Sekalaiyasiyo, koli osuvo. Nunumu'mo hu'nana gemo Goti'a ago afi'niyanageno akamo Ilisamete'mo ve mafa'nemo alino ategaiye. Agi'amo Yoni'ae huka ato. 14 Mafa'nekamo alino atesigekae'mo kamogaga aika kavayagunagu nehisanage'apae'mo muki'amogimo apamogaga aigae. 15 Goti aulagale'mo ala agi vekamo maigiye. Lokiya ani'mo nete'a negi ne'malaya agufa ani'mo o'negaiye. Ita'amo'mo alino atesiya afinateti'mo Aote Auneme'amo'mo aipafi'mo havai teno maigiye. 16 Agaemo muki Isaleli vaya'mo alino aino atagineno apatesige'apae'mo Goti'a Ala kava ne'apimotegamo ugae. 17 Agaemo Auneme'amo'mo lokiya'amo aliteno Ilaiya'a hu'niya agufa kava huno uno hogotesigeno Ala kava ne'mo agae akame'mo huno egaiye.Agaemo vaya'ai apaipamo alino aino afe leno apatesige'apae'mo mafa'ne'apie'mo alagepa apaipamo kali'a apategae. Agaemo ge no'afisaya vaya'ai apaipamo alino afe leno apatesige'apae'mo fatago vaya'mogi ne'aliya agufa apaipa apakesa aligae. Agaemo Ala kava ne'mo vaya'amo agaetefe'mo alo huno apategaiye, huno ha pai'niye.

18 Sekalaiyasi'a enisole vekae'mo, kagaemo nehana lama gee'mo haiya kava hu'na alagi lama gemo nehane, hu'na afiguve. Nagaemo ago kosuna le'nogeno a'nimo ago anekalo le'niye, huno ha pai'nigeno'ae'mo, 19 nagaemo Gemaliyo'namae. Muki afina'mo Goti haopale'mo ali'ya'amo alisuvafe'mo he ti'na ne'mauve. Goti'a kagaemo kamogaga aisana gemo kaha paisuvafe'mo alino nate'nige'na kagaetegamo emi'ne'nove. 20 Emine'nova'monanafa ge'nie'mo kagesa afika fatago osu'nana'mofe'mo kagemo o'aika afa'a maime maime ne'visanageno lekana pai'niya afina'mo ge'nimo afole aigiye, huno ha pai'niye.

21 Kumatega mai'naya vaya'mogimo Sekalaiyasife'mo agava mai'ne'apae'mo, na kava higeno'ae'mo alopa mono nopi'mo yatala afina'mo mai'niye, hu'a hu'nae. 22 Nopati'mo emineno'ae'mo ge osuno ayatetike'mo avame name kava'mo hu'nige'a agete'apae'mo, agaemo alopa mono nopi'mo alagamuna agegekana huno aeto agufa kava'mo age'neno'ae'mo nehiye, hu'a age'nae. Ayatetike'mo avame name kava'mo huteno ge osuno afa'a mai'niya'mofe'mae. 23 Henaga'amo mono nopi'mo ali'ya'mo alino hano huteno no'alegamo u'niye. 24 Ani kana'amo utegeno a'amo Ilisamete'a aipagu'e'mo mai'neno'ae'mo faefu'a kaimo fala kino mai'neno'ae'mo, 25 Ala kava ne'mo'a nageme nageme huno eno hemenimo naha maeno vaya'ai apaulagale'mo navagage nehiya kava'nimo aeno kalo paeno atale'niye, huno hu'niye.

Yesu'mo alika ategane, huno ha pai'niya gemae

26 Ilisamete'mo sigisi kaimo aipagu'e'mo mai'nigeno Goti'a enisole veka'amo Gemaliyo'a alino ate'nigeno Galeliya kotega Nasalasa taonifi'mo emine'niye. 27 Ani taonifi'mo mago a'mafa'nemo agi'amo Maliya'a ve'e'mo magokepi lokaeno ohavae'niya a'mafa'nemo Nevini nofi vayapati vekamo Yosefe'a aliguve, huno huteno lekana pai male'niya a'mafa'nemo mai'niye. 28 Enisole vekamo'a agaetegamo emineno, vase hutalo, huno ge amamaeteno'ae'mo, Ala kava ne'mo'a kagae'e'mo magokepi lokaeno mai'neno muki asole a'ne anagapati'mo lekana paino kateteno kaha mae'niya ane, huno ha pai'niye. 29 Maliya'a ani gemo afiteno'ae'mo lusi kava huno koli huteno'ae'mo, ani gemo aepa'amo na agufa gemo nehiye, huno agesa afino mai'niye. 30 Enisole vekamo'a, Maliyao, koli osuvo. Goti'a lekana paino kateteno kaha mae'niye. 31 Afiyo, kaipagu'e'mo maiteka ve mafa'nemo alika ategananagi ani mafa'nemo agi'amo Yesu'ae huka ato. 32 Ala agi vekamo mai'nisige'a agi ae'apae'mo, hogote vekamo aeno apaka se'niya vekamo mafa'ne'amo mai'niye, hu'a hugae. Aginago vekamo Nevini'a Isaleli vaya'ai ala'apimo mai'neno yagaino ne'apateya kava huno Ala kava ne'mo Goti'a, ala'apimo mai'neno yagaino apatesiya vekae, huno ategaiye. 33 Agaemo Yekopu nofi vaya'ale'mo yagaino apateno hano osuno yagaino apateno maigiye, huno ha pai'niye. 34 Maliya'a, Vele'mo o'mai'nogi haiya kava huno afole aigiye, huno ha pai'nigeno'ae'mo, 35 Aote Auneme'amo'mo Goti himamu'amo hiyakana huno kagaete'mo eminesigeka alika atesana mafa'nee'mo, aote vekamo Goti Mafa'ne'ae, hu'a agi aegae. 36 Afiyo, negafokamo'mo Ilisamete'a anamo'mo maime eno anekalomo le'niya'monanafa sigisi'a kaimo aipagu'e'mo mai'niye. 37 Goti'a mago kava'mo afa'a osisiya agufa kava'mo ohane'nifa muki kava'mo afa'a hugiye, huno ha pai'nigeno 38 Maliya'a, Goti ali'ya'amo ne'aluva a'mafa'nemo mai'novanageno muki hu'nana kava'mo nagaete'mo afa'a afole aigiye, huno ha pai'nigeno enisole vekamo ataleno u'niye.

Maliya'a uno Ilisamete'e'mo lokae'ana mai'na'a gemae

39 Aise afina'mo utegeno Maliya'a malage huno he tino aise aulafi hane'niya kote'mo uno Yutiya kotega mago taonifi'mo ava'yi huteno 40 Sekalaiyasi nopi'mo haino Ilisametefe'mo ge amamae'nigeno 41 Ilisamete'a ne'afigeno'ae'mo aipafi'mo mai'niya mafa'nemo'a fanagu panage hu'nigeno Aote Auneme'amo'mo Ilisamete aipafi'mo havai te'niye. 42 Ilisamete'a alopa gefati'mo ge huno'ae'mo, Goti'a mago a'ne anaga'aitegamo nosiya agufa kava'mo huno kagaemo lusi kava huno kaha maeno kamiteno kaipafi'mo mai'niya mafa'ne'e'mo ha mae'niye. 43 Ina agufa a kanomo mai'novana na kava higeka Ala kava ne'nimo ita'amoga nagaetegamo e'nane. 44 Afiyo, ge namamae'nana gemo ne'afugeno'ae'mo naipafi'mo mai'niya mafa'nemo'a amogaga aiteno fanagu panage hu'niye. 45 Ala kava ne'mo'a kaha pai'niya gee'mo kagesa afika fatago hutekae'mo, afa'a afole aigiye, huka hu'nana a'mo mai'nananageka afa'a kamogaga aigane, huno ha pai'niye.

Maliya'a Goti agi'ale'mo alino asaga hu'niya gemae

46 Maliya'a huno'ae'mo,

Naipafi'mo Ala kava ne'mo agi'ale'mo ali'na asaga hu'na ne'atove. 47 Naune'name'mo Goti'a agufamo alino katino ne'ateya vekae'mo amogaga ne'aiye. 48 Ina agufa ali'ya'mo ne'aluva a'mafa'ne'amo mai'nogeno nagaefe'mo agesa afi'niya'mofe'mo, Goti'a ha mae'nigeno alagepa huno mai'niye, hu'a hugae. Hemenimo mai'naya vaya'mogi'e henaga'amo muki ali'a apatesaya vaya'mogi'e'mo ani gemo hugae. 49 Aote ala agi vekamo ayamufa'age vekamo'a lusi kava huno naha mae'niya'mofe'mo nava gemo hugae. 50 Agaefe'mo koli hute'a aiyafi'mo mai'naya vaya'aife'mo hau huno apateme apateme uno hau huno ne'apate. 51 Ayateti'mo lokiya kava'mo huteno ala vaya'mo mai'none, hute'a, ina kava'mo hugune, ma kava'mo hugune, hu'a apakesa ne'afiya vaya'mo hapa faino apatalege'a u'e'a nehae. 52 Agaemo lokiya vaya'mo yagai'a ne'apataya vaya'mo alino afepi apateteno ina agufa vaya'mo alino asaga huno ne'apate. 53 Apaka neteya vaya'mo alagepa ya'mo lusi kava huno alino ne'apamige'a ne'a apamu nehae. Ne'apamiya'monanafa kagemi ya'apimo hane'niya vaya'mo o'apamino hapa faino apatalege'a afa'a ne'vae. 54 Agaemo Emalehamufe'mo ge huteno aginago vaya'aife'mo, nahau hu'na lapatete'na lapa maege lapa maege hu'na lapa maegauve, huno hapa paite hapa paite huno hapa pai'niye. Hemenimo laginago vaya'aife'mo hapa pai'niya gee'mo agesa afino ho huteno Isaleli nofi vaya'mo ali'ya'amo ne'aluna vaya'amo laha mae'niye,
huno hu'niye. 56 Maliya'a Ilisamete'e'mo lole'e mago'e kaimo lokae'ana maite'ana ataleno no'alegamo u'niye.

Ilisamete'a Yoni'mo alino ate'niya gemae

57 Ilisamete'a mafa'nemo alino atesiya afina'mo ago afole ai'nigeno ve mafa'nemo alino ate'niye. 58 Ko'alega vaya'mogi'e agai'a vaya'amogi'e'mo ani gemo afite'apae'mo, Ala kava ne'mo'a hau huno ateteno lusi kava huno ha mae'niye, hu'a hute'a Ilisamete'e'mo magokepi apamogaga ai'nae. 59 Magoke salemo utegeno Yu vaya'ai kava'mo hu'a ani mafa'nemo agufamo lagausayafe'mo e'apae'mo, afo'amo agile'mo ategaune, hu'a hu'nageno'ae'mo 60 Ita'amo'mo, ha'ao, Yoni'ae, huta ategaune, huno hapa pai'nige'apae'mo, 61 negafokamogipati'mo ani agufa apakimo ohane'niye, hu'a ha pai'nae. 62 Apayateti'mo avame name kava'mo hute'a, haiya agimo mafa'nekamo ategane, hu'a afo'amofe'mo ge hu'a afi ge'nageno'ae'mo, 63 mago avo'mo kaesuva ya'mo alitapa namiyo, huno hapa pai'nige'apae'mo ali'a ami'nageno avo'mo kaeno'ae'mo, agi'amo Yoni'ae, huno avo'mo kae'nige'apae'mo hapau ai'nae. 64 Ani afina'mo malage huno agemo aino halo ai'nigeno Goti agi'ale'mo alino asaga hu'niye. 65 Ani ko'ale vaya'mogi afite'a koli hu'nageno ani kavafe'mo ava gemo muki haopale Yutiya aulafi kotegamo aino atagu faeno u'niye. 66 Ava gemo afite'apae'mo ali'a apaipafi'mo malete'a, henaga'amo haiya agufa mafa'nemo maigiye, hu'a hu'nae. Ala kava ne'mo'a alagepa huno ha maeteno yagaino ate'niye.

Sekalaiyasi'a aune gemo hu'niya gemae

67 Afo'amo'mo Sekalaiyasi aipafi'mo Aote Auneme'amo'mo havai te'nigeno Gotitegati aune gemo alinineno aeno hakalo huno hapa paino'ae'mo,

68 Ala kava ne'mo Isaleli vaya'ai Goti'apimo'mo emineno laha maeno hatu maeno late'niya'mofe'mo agi'ale'mo alita asaga higetao. 69 Agaemo ali'ya'amo ne'aliya veka'amo Nevini vayapati'mo ayamufa vekamo lagufamo alino katino latesiya vekamo ago alino afole aino ate'niye. 70 Akeya'vilagamo ani kavafe'mo agaetegati gemo alini e'a ae'a hakalo hu'a hapa nepaiya vaya'ai apavayafati'mo ago laha pai'niye. 71 Ina gemo hu'a laha pai'nae, kametimogi apayapati'mo lagufamo alino katino lateteno muki vaya'amogimo hosu apaipa kali'a nelataya vaya'ai apayapati'mo hapa faleno lategaiye, hu'a hapa pai'nae. 72 Goti'a kotalake ge'amo hu male'niya aote ge'amo laginago vaya'aife'mo, nahau hu'na lapategauve, huno hapa pai'niya gee'mo agesa afino ho huteno ani kava'mo hu'niye. 73 Goti'a laginago vekamo Emalehamufe'mo lama gemo huno ago'yamo ataleno ge hugekana agufa kavafe'mo agesa afiteno laha mae'niye. 74 Agaemo kame vayatimogi apayapati'mo lagufamo alino katino latesigeta ma mopafi'mo maisuna afina'mo ali'ya'amo ne'alitae'mo koli osuta aote fatago kava'amo huteta alagepa huta maige maige huta maigune. 76 Kagaemo mafa'ne'nimogae, hogote vekamo aeno apaka se'niya vekalegati'mo ge'amo alinineno aeno hakalo huno hapa nepaiya vekae, hu'a kagi aegae. Kagaemo Ala kava ne'mo esiya ka'mo alagepa huka valika ate'nisanageno egaiye. 77 Kagaemo, Gotitimo'a aipamo'mo falu huteno hau huno lateteno ha le yakana vekamo alino ate'niye. Yegemo'mo aeno ha lelino haine ne'eya kavakana huno lagaetegamo e'niye. Goti'a agaeteti'mo lapakufamo alino katino lapateteno hosu kavatapimo alino atalegaiye. 79 Lagaetegamo eno'ae'mo hanipi'mo fali kava'mo aune'afi'mo mai'nona vaya'mogitalegamo ha le ya'mo alino lamiteno alagepa ka'mo Goti'e'mo lokaelita visuna ka'mo alino lave ligiye, huka hapa paigane,
huno hu'niye.

80 Yoni'a ko siteno'ae'mo auneme'amo'mo lokiya vai'nigeno ka'me kotega maime maime ne'uno'ae'mo Isaleli vaya'ai apaulagale'mo afole ai'niye.